Тропарь, глас 4

Зако́на Бо́жия учи́телю / и заповедей евангельских верный исполни́телю, / священномучениче Константи́не, / му́ченичества кровью зе́млю Донскýю ороси́л еси, / темже моли́твами твои́ми / в лю́дех любо́вь к Це́ркви Христо́вой возрасти́ / и в житии доброде́тельнем утверди.

Канон священномученику Константину

Песнь 1

Ирмос: Моря чермную пучину / невлажными стопами / древний пешешествовав Израиль / крестообразныма Моисеовыма рукама / Амаликову силу в пустыни победил есть.

Припев: Священномучениче Константине моли Бога о нас.

Воли Божией послушлив быв, священства дар приял еси, священномучениче Константине, и за Христа даже до смерти пострадав, верный сын Церкви явился еси.

Просвещением спасительного проповедания, чистому сердцу твоему, яко зерцало нескверное отче возсияв, лучи всем испустил еси.

Безбоязненно проповедовал еси людем покаяние, священномучениче Константине, да обратят сердца своя к Богу и только на Него в скорбях и лишениях упование имеют.

Слава, и ныне: Богородичен: Мати Божия, Дом Твой, Святая Русь, молит Тя:  избави люди Твоя от всякия нужды и вечнаго осуждения.

Песнь 3

Ирмос: Веселится о Тебе церковь Твоя, Христе, зовущи: / Ты моя Крепость, Господи, / и Прибежище и Утверждение.

Егда прииде испытание веры твоея, священномучениче Константине, страдание за Христа, яко благодатный дар, приял еси  и кровью твоею русскую землю обагрил еси.

Егда прииде гонения от безбожных, столп непоколебим Русския Церкве  явился еси, священномучениче Константине, святых, яко ближних сродник, в помощь призывая. С нимиже вместе ныне прославляешься.

Аще и умерщвлен был еси телом, священномучениче Константине, обаче духом козни диавольския посрамил еси, имея Христа Прибежище и Утверждение.

Богородичен: Тя Предстательницу, Пречистая Дево, молим: преложи нашу печаль на радость и скорби належащия избави, Заступнице наша.

Седален, глас 3:

Заветы исповедников и священномучеников Христовых восприем, душу твою за веру Православную положил еси, святе, еюже утверждается Земля Русская. Сего ради молися, священномучениче Константине, любовию чтущым тя верным Христу до конца быти.

Слава, и ныне, Богородичен:

Не имамы иного прибежища разве Тебе, Богородице, отечества нашего усердная Заступнице: всяк бо, почитаяй Тя, надежду обретает.

Песнь 4

Ирмос: Вознесена Тя видевши Церковь на Кресте, / Солнце Праведное, / ста в чине своем, / достойно взывающи: / слава силе Твоей, Господи.

Да не дерзают языцы рещи: где есть Бог ваш? Кровь бо новомучеников от земли нашея вопиет: Господи, Господь наш, яко чудно имя Твое по всей Русской земли.

Имже образом желает олень на источники водныя, тако ты, страстотерпче Константине, к живоносным страданием за Христа притекл еси, имиже присно священно обновляется лице земли Русския.

Вся земная ни во что вменив Христа ради, словом и житием, священномучениче Константине, верных поучал еси: о Боге сотворим силу и Той уничижит стужающия нам.

Богородичен: Стена необоримая и Покров всемощный Российским новомучеником явилася еси, Пресвятая Дево, темже Тя величаем.

Песнь 5

Ирмос: Ты, Господи, мой Свет / в мир пришел еси, / Свет святый, обращаяй из мрачна неведения, / верою воспевающыя Тя.

Яко лучь Солнца Правды явился еси, священномучениче Константине, и страданиями твоими мглу безбожия над Отечеством нашим рассеял еси.

Егда безбожнии хотяше убити тебя, священномучениче Константине, Господь яви тя исповедника Своего всем концем Земли Русския.

Русския Церкве светильниче священный, Константине, кровьми мученическими неугасимо светяй и у Престола Божия предстояй, молися о чтущих тя.

Богородичен: Иже от Девы неизреченно рождейся, Господи, сохрани молитвами Ея Церковь Твою, Тебе славящую православными гласы.

Песнь 6

Ирмос: Пожру Ти со гласом хваления, Господи, / Церковь вопиет Ти, / от бесовския крове очищшися, / ради милости от ребр Твоих / истекшею Кровию.

Восприим мечь духовный, иже есть глагол Божий, безбожных козни сокрушил еси, священномучениче Константине, и вся разжженныя стрелы лукаваго угасил еси щитом веры Православныя.

Во священниках благочестно пожив  и мучения путь терпеливно восприим, сугубую мзду на Небесех обрел еси, священномучениче Константине, идеже евангельски присно радуешися и веселишися.

Священнодействовав благочестно Христову службу тайную, словесное овча сам принеслся еси Ему жертва приятна и благоугодна совершаема кровию, преблаженне.

Богородичен: Поем Тя, Предстательнице теплая и Заступнице христиан, Богородице Всепетая, яко со всеми святыми земли Русския молиши Сына Твоего и Бога нашего обрести нам велию милость.

Кондак, глас 3:

Равноапостольному царю тезоименитый, / постоянство в вере Христу даже до смерти явил еси, / темже и нам,  на  молитвы твоя уповающим, / твердое стояние в вере испроси, / и душам нашим велию милость.

Икос:

Красуйся и ликуй, Церковь Русская, яко благоплодная лоза священнаго страдальца израстившая, добропобедным мучением сердца верных укрепившаго, заповеди Господни исполнившаго и присно евангельски учившаго: приидите, чада, послушайте мене, не убойтеся от убивающих тело, души же не могущих убити, убойтеся же паче могущаго душу и тело погубити в геенне. Темже, священномучениче Константине, моли Христа  Бога спастися душам нашым.

Песнь 7

Ирмос: В пещи авраамстии отроцы персидстей / любовию благочестия паче, / нежели пламенем опаляеми взываху / благословен еси в храме славы Твоея, Господи.

Яко трие отроцы в пещи Вавилонстей пламенем объятии молитвою не сгараху, тако ты, священномучениче Константине, во огни мучений благодатию веру сохранил еси. Сего ради ныне с новомученики Российскими ликуеши: благословен еси, Боже отцев земли нашея.

Якоже древле отроцы, в пещи неопаляемии, златому истукану не поклонишася, тако же и ты, священномучениче Константине, огнем мучений неопаляемь, безбожие небоязненно обличал еси, взывая с новомученики Российскими: благословен еси, Боже отцев земли нашея.

Жертву живую и всесожжение Творцу себе самаго принося, священномучениче Константине, с новомученики Российскими воспевал еси: могущии покаряйтеся, яко с нами Бог отцев земли нашея.

Богородичен: Яже паче ума и естества Бога рождши, Неискусомужная Марие, чтущыя Тя от враг видимых и невидимых избави, Ты бо еси земли отцев наших Держава необоримая.

Песнь 8

Ирмос: Руце распростер Даниил, / львов зияния в рове затче, / огненную же силу угасиша, / добродетелию препоясавшеся , / благочестия рачители отроцы взывающе: / благословите, вся дела Господня, Господа.

Землю Донскую, безбожными гонении нещадно жегомую, слезами и кровьми твоими напоил еси, священномучениче Константине, сего ради плоды веры, чада церковная, возрастил еси.

Злобы мучителей не убоялся еси, огнем любве Божественныя тыя препобедив, темже благодать молитися о нас стяжал еси, священномучениче Константине, достохвальне.

Благословляя гонителей твоих, блаженне Константине, усердно молился еси за них, да покаются и купно с верными братиями благословят Господа.

Богородичен: Христа зрящи умерщвляема, Многопетая Владычице, и, видящи исполнение Симеонова проречения, слезящи, взываше: благословен еси, Боже, во веки.

Песнь 9

Ирмос: Камень нерукосечный / от Несекомыя Горы, Тебе, Дево, / краеугольный отсечеся, / Христос, совокупивый разстоящаяся естества, / тем, веселящеся, Тя, Богородице, величаем.

Руками беззаконных убиен, жертва благоприятная и вольное заколение Богу принеслся еси, святче Божий Константине. Тем благодарне память твою почитаем.

Господь, исполняя смотрение Свое о Церкви Русстей, заступника тя, священномучениче Константине, содела. Темже молися Ему, во благочестии нам пребывати и спастися душам нашым.

О, бездна благости Божия! Дарова бо Бог возлюбленным Своим веры ради пострадати, и тя, священномучениче Константине, яко плод красный спасительнаго сеяния, избра от земли Донской.

Богородичен: Разори советы вся на ны вооруженныя, Мати Бога Вышняго, и радости исполни уповающыя на Тя, да усердно вси Твое проповедуем заступление.

Молитва

О, преблаженне отче Константине, преславный угодниче Божий, добрый пастырю Росто́вский и пе́рвым мýчеником Церкве Христовой подражáтелю! Ты во дни безбо́жия и поругáния святы́нь Отéчества нáшего достослáвный примéр пáстырскаго свиде́тельства о Христе́ Воскре́сшем яви́л еси́, нéмощем наро́да сострадáя, грехи́ и отступлéния обличáл еси и о спасении стáда Христо́ва ревновáл еси́. Сего ради, яко агнец незло́бивый, на страдáния потéкл еси и, прии́м их, ны́не в невечéрнем Све́те Победи́теля смéрти пребывáеши. О, священномучениче преславне! Испроси́ у Го́спода ми́р Отéчеству нáшему, людем его – дрýг ко дрýгу любо́вь, святи́телям и пáстырям – благоговéние и рéвность в служéнии, властям предержáщим – благое о наро́де попечение, учáщим – мýдрость и терпение, учáщимся – кро́тость и вразумлéние, де́вам и ю́ношам – целомýдрие, супругам – ве́рность и о чадах благодать и каждому по прошéнию – по́мощь в делах, я́же ко спасéнию, да, благодаря́ще тебя, прослáвим дивнаго во святых Своих Еди́наго поклоня́емаго Бо́га, Отца и Сына и Святаго Духа, во ве́ки веко́в. Ами́нь.